A Biblioteca é onde viven os vosos ficheiros: unha árbore de cartafoles da entidade, con subir, crear cartafoles, renomear, mover arrastrando, buscar e descargar. O que sobe unha persoa véno as demais da entidade.
Cada subvención ten o seu
Ao dar de alta unha subvención créaselle o seu cartafol dentro de Subvencións, co nome da convocatoria. Ese nome fíxase ao creala e non segue o do proxecto: renomear un proxecto non pode mover de sitio os papeis de ninguén.
A lapela Documentos dunha subvención é ese mesmo cartafol, non unha copia. O que subas desde aí vese igual entrando pola Biblioteca. Ter dous sitios obrigaría a decidir en cal vai cada papel, e a resposta cómoda —nos dous— é a que garante que un quede vello.
Non é o mesmo que A miña entidade
En A miña entidade vai a documentación que se repite en cada solicitude —estatutos, CIF, memoria de actividades, certificados de estar ao corrente, poder de representación—, ordenada por categorías e con ata tres ficheiros en cada unha, para poder gardar o deste ano e o do anterior. A Biblioteca é para todo o demais.
Os límites e o coidado
- Ata 2.000 ficheiros por entidade e oito niveis de cartafoles.
- Ata 25 MB por ficheiro.
- Os ficheiros gárdanse nun almacén privado e sérvense con ligazóns que caducan: un enderezo copiado da barra do navegador non segue abrindo os vosos estatutos dentro dun mes.
- Ábrense dentro do navegador os PDF, as imaxes e o texto plano; o resto descárgase, porque abrir segundo que ficheiro dentro do noso dominio sería un buraco de seguridade.