En Tarefas hai unha soa lista con todo o pendente de todas as vosas subvencións á vez, ordenada por cando toca e non por a que subvención pertence. Dentro conviven dúas cousas distintas, e convén saber cal é cal.
As tarefas teñen casiña
Son as que alguén escribe. Unhas escribídelas vosoutras; outras aparecen soas: ao dar de alta unha subvención cópiase a documentación que piden as súas bases, se esa convocatoria xa pasou pola lectura con IA. Cada tarefa pode levar data, a persoa da casa que a leva e unha nota.
Os prazos non
Presentar antes de que peche a convocatoria, a resolución que se espera, o prazo para alegar e a data de xustificación non se gardan en ningunha parte: calcúlanse das datas que xa ten cada subvención. É a propósito. Gardalos crearía dúas verdades —corrixes a data na ficha e a tarefa segue dicindo a de antes—, e unha lista na que un prazo mente unha vez xa non a mira ninguén.
Por iso un prazo tampouco se marca como feito: péchase facendo a cousa. O de presentar desaparece cando moves a subvención a «Enviada»; o de alegar, cando pos a data de presentación na lapela de Alegacións.
Todo se agrupa polo preto que está: atrasado, hoxe e mañá, esta semana, este mes, máis adiante e sen data. Os cortes son por días e non por semanas de calendario, para que «esta semana» signifique o mesmo un luns que un venres.
Dentro da ficha dunha subvención tes a mesma lista, pero só a súa, na súa lapela de Tarefas. Alí as feitas vense riscadas e pódense agochar: esa lista non é de pendentes, é o expediente do que pide esa convocatoria, e o entregado importa tanto como o que falta.