A regra é curta: o único que sae cara á intelixencia artificial é o que lle mandades analizar, e só cando o pedides.
O que non se envía
A documentación da entidade que gardades na biblioteca —estatutos, contas, certificados, actas— non se manda á IA en ningún momento. Vive nun almacén privado que só ve a vosa entidade, non é accesible por un enderezo público e sérvese con ligazóns asinadas que caducan: un enderezo copiado da barra do navegador non segue abrindo os vosos estatutos dentro dun mes. Bórrase cando queirades.
O que si se envía
- O perfil da entidade, cando pedides unha análise de encaixe. Vai como texto dentro da petición e non se garda alí de forma permanente.
- O proxecto que subides para [o match](/documentacion/match). Ese si é un ficheiro: súbese ao almacén de ficheiros do provedor e vive alí noventa días como moito, tras os cales caduca só.
Os vosos datos non se usan para adestrar modelos: o provedor non adestra co que se lle manda pola súa interface de programación. As vosas memorias non acaban dentro dun modelo.
Aínda así, antes de subir unha memoria quitade os nomes e os datos das persoas ás que atendedes que non fagan falta para a análise. Co proxecto anonimizado o resultado é o mesmo.
O asistente de Axuda tamén fala co modelo, pero non lle chega ningún ficheiro voso nin o contido das vosas convocatorias: só números e estados —en que plan estades, canto perfil tedes cheo, cantos avisos hai sen ler—.