O que se garda no panel —convocatorias, subvencións, tarefas, biblioteca, documentación— é da entidade, non de quen o creou. Esa é a diferenza cunha conta compartida e o contrasinal apuntado nun pósit: se mañá se vai quen o montou todo, non se vai nada con ela.
Convidar a alguén
Desde A miña entidade, na lapela Staff. Ponse o correo e o rol, e chégalle un convite cunha ligazón que vale sete días e serve unha soa vez. A ligazón vese tamén na pantalla e pódese copiar: o correo pérdese no cartafol do correo lixo cunha frecuencia que non se pode ignorar.
Non fai falta que acepte co mesmo enderezo ao que se lle mandou: o que protexe a ligazón é que caduca e que só vale unha vez. Convidar outra vez o mesmo enderezo anula o convite anterior, para que non queden dúas ligazóns boas dando voltas.
Unha conta pertence a unha soa entidade. Se a túa xa traballa noutra e ten cousas gardadas, o convite non se pode aceptar: hai que entrar con outra conta ou escribirnos para movelo. Se a túa entidade está sen estrear —sen nome e sen nada dentro—, a conta múdase sen perder nada.
Dous roles e nin un máis
Administra e Membro. Quen administra non ve pantallas nin datos distintos: o único que pode e un membro non é xestionar as persoas —convidar, quitar e cambiar de rol— e ver a lapela de Facturación. Todo o demais úsano os dous igual. Non se lle pode quitar o rol á última persoa que administra nin deixar que se vaia sen nomear outra: dunha entidade sen ninguén que administre só se sae por soporte.
Dar de baixa a alguén non borra nada seu: perde o acceso e o seu traballo queda onde está. Quen se sae pola súa conta comeza de cero cunha entidade nova e baleira.
O que custa o equipo
Co plan gratuíto convidar non custa nada. Cun plan de pagamento, a primeira persoa vai incluída e cada unha máis suma a súa praza á factura. A praza ocúpase ao convidar, non ao aceptar, e non baixa ata que o plan renove. Os importes están en Os plans.