Inicio é a portada do panel e contesta a unha soa pregunta: que hai que mirar hoxe. Arriba, catro cifras; debaixo, tres listas. Cada cifra é unha ligazón á pantalla que a produce, porque un número que non leva a ningures obriga a reconstruír a man o filtro que o xerou.
- Coa data xa pasada: tarefas e prazos atrasados. Leva a Tarefas e píntase de vermello cando non é cero.
- Das túas pechan esta semana: do que tendes gardado, o que pecha en sete días. É o único que podedes perder. Leva a Gardados.
- Subvencións en marcha: todo o que non está denegado, incluídas as concedidas —unha concedida é cando comeza a xustificación—. Leva a Xestión subvencións.
- Abertas que che encaixan: convocatorias co prazo aberto que encaixan co voso perfil. Leva a Buscar & Analizar con ese filtro xa posto.
Non hai contador do catálogo enteiro, e é a propósito: só entra a cifra que cambia o que alguén fai hoxe. Cantas convocatorias existen é un número bonito e sen consecuencias; que unha peche esta semana fai erguerse da cadeira.
As tres listas
O que toca vai primeiro, á esquerda: tarefas e prazos de todas as vosas subvencións mesturados e ordenados por cando vencen, non por de onde saen. Non teñen casiña —aquí mírase, non se marca— e para iso está Tarefas, a onde leva a ligazón de abaixo.
Á dereita, O que segues —as convocatorias gardadas, por orde de peche— e Novas que encaixan —abertas que vos encaixan e que aínda non gardastes—. Se aínda non puxestes os ámbitos, a segunda invítavos a completar o perfil en vez de amosar unha lista baleira: sen perfil non hai con que comparar.
Entre as cifras e as listas aparece a barra do perfil da entidade mentres falte algo por encher. Ao chegar ao 100 % desaparece soa.