Xestión subvencións é a outra metade do produto: en Buscar & Analizar decides a que te presentas, e aquí levas a conta do que xa decidiches presentar. É un panel cunha columna por fase —Preparando, Enviada, En resolución, Concedida e Denegada— e unha tarxeta por subvención, que se arrastra dunha columna a outra segundo avanza.
Como se comeza unha
Desde a ficha dunha convocatoria, co botón de xestionala. Só pregunta dúas cousas: como lle chamades vosoutras ao proxecto e a que exercicio o imputades. Premelo dúas veces non crea dúas tarxetas: se xa estabades xestionando esa convocatoria nese exercicio, lévate á que tiñas.
Tamén a podes dar de alta a man desde o propio panel e escribir o nome da convocatoria. Media xestión real son convocatorias que non saen en ningún buscador —un concello pequeno, un premio dunha fundación—, e o panel ten que contalas tamén.
Ao creala pasan dúas cousas máis: ábrese o seu cartafol na [Biblioteca](/documentacion/biblioteca) e, se desa convocatoria xa lemos as bases, a documentación que piden cópiase ás súas tarefas.
O que garda cada ficha
- Os importes: o solicitado, o concedido e a porcentaxe que tendes que poñer do voso peto.
- As datas: envío, resolución prevista, resolución e data límite de xustificación.
- A puntuación que vos deron e a nota de corte do ano, cando se publica: é o único que consola dunha denegada, saber por canto foi.
- O número de expediente, quen asina, quen o leva por dentro, a entidade socia e a ligazón ao voso cartafol compartido.
E cinco lapelas: Solicitude, Tarefas, Xustificación, Alegacións e Documentos. O de despois de que se resolva vive en A xustificación.
O exercicio non é un adorno: é o que separa a deste ano da do ano pasado, que son dúas tarxetas distintas aínda que sexa a mesma convocatoria. Unha convocatoria que pecha en xaneiro adoita ser do exercicio seguinte.