Os interruptores están en A miña entidade → Notificacións, xunto a un cadro que resume onde chega cada cousa. Son teus, non da entidade: o aviso é da entidade, pero a caixa de correo é de cada quen. Apagar un non deixa sen el as túas compañeiras.
- Correo diario de avisos. Se o apagas segues tendo os avisos na web; o que deixas de recibir é o correo. A ligazón para darte de baixa do pé do correo apaga isto e nada máis, cun clic.
- Cambios no que sigo. Bases, documentos, anuncios do boletín, resolucións e edicións novas do que seguides ou xestionades. Os cambios de data e as aperturas de prazo non se apagan aquí: son demasiado importantes.
- Recordatorios de prazo. Peches, alegacións, xustificación, resolucións previstas, tarefas e execución.
- Novas que vos encaixan. Cada luns, as convocatorias novas da semana que encaixan ben co voso perfil (60 % ou máis), cinco como moito e sen repetir as que xa seguides ou descartastes. Van dentro do correo dese día, nunca nun á parte.
- Consellos e recordatorios. Poucos correos e só cando non estás na web: a túa proba, traballo a medias, convocatorias que pechan e vos encaixan. Dous á semana como moito, e nunca o mesmo día que o de avisos.
As preferencias filtran ao ler, non ao escribir. O aviso créase igual para a entidade e cada persoa ve o que pediu ver: se ti apagas os prazos e a túa compañeira non, o recordatorio segue aí para ela.
A antelación do peche
Debaixo dos interruptores escóllese avisar do peche con 3, 7 ou 14 días de antelación. Este axuste é da entidade e só quen a administra pode cambialo: o recordatorio é unha fila compartida e non pode existir a catorce días para unha e a tres para outra. Cambialo non repite o recordatorio que xa saíu. E sexa cal sexa o número, o día antes avísase sempre.
O que non se apaga
Dúas cousas non as filtran os interruptores: que cambie unha data ou se abra o prazo de algo que seguides ou xestionades, e o urxente —pecha hoxe ou mañá, vencen as alegacións ou a xustificación—. Por correo só deixan de chegarche apagando o correo diario enteiro. Urxente non significa «ao momento»: sae no correo das 8:00 coma o demais, só que o primeiro.
Gardar sen avisos non serve de moito
Gardar unha convocatoria é, sobre todo, pedir que a vixiemos. Con cambios e prazos apagados á vez, esa vixilancia queda case muda, e o panel dío en vez de calalo: a campá pon «Non tes os avisos activados», cun botón para acendelos; e ao gardar unha convocatoria sae un aviso flotante, «Gardada, pero non te avisaremos», co mesmo botón.