Os avisos son o que se moveu no que xa vos importa: as convocatorias que gardastes, as que estades xestionando e os programas e financiadores que seguides. Esa é a regra que evita o ruído. A única excepción son os luns: ese día contámosvos tamén as convocatorias novas da semana que encaixan ben co voso perfil.
Onde che chegan
- Na web. Ao entrar, os avisos novos saen arriba á dereita —cada un unha soa vez, tres como moito, co logo do financiador e unha cruz para pechalos— e quedan na campá, que se pon ao día soa.
- Por correo. Un ao día, ás 8:00, para cada persoa, e só se hai algo que obriga a facer algo. Está contado no correo diario.
Cambios na convocatoria
Cada madrugada vólvese pedir á BDNS a ficha de todo o que segue vivo e compárase coa que tiñamos. As privadas e europeas que seguides non están na BDNS: esas revísaas cada noite o noso axente na súa propia páxina. E só se compara o que ten consecuencias: o título cambia de acentos cada dous por tres, e avisar diso ensina a ignorar os avisos.
- Cambia unha data ou ábrese o prazo. É o máis importante e sempre vai tamén por correo.
- Cambian as bases: un anuncio novo no boletín —que adoita ser unha corrección ou unha ampliación—, un documento novo ou modificado (as traducións non contan), un orzamento que sobe ou baixa, ou un cambio na ligazón ás bases ou na sede electrónica.
- Hai resolución. Nas da BDNS detectámola o día que aparecen as concesións. Por correo só vos chega se tedes esa convocatoria presentada en Xestión subvencións; se só a seguides, queda na web.
- Volve convocarse, que é o que chega un ano despois se seguides o programa ou o financiador e non só a edición dese ano. Vai no correo dos luns.
Recordatorios das vosas datas
Calcúlanse cada mañá coas datas que xa tedes en Xestión subvencións e no gardado:
- Por correo e na web: o peche do gardado ou en preparación (coa antelación da entidade e o día antes; se a data é unha estimación nosa, pon «Peche estimado»), as alegacións a 3 días e o día antes, a xustificación a 30, a 7 e o día antes, e o fin do voso plan sete días antes.
- Só na web: «deberían resolver esta semana», unha tarefa que che asignan ou que vence mañá ou hoxe (a quen a ten asignada, ou a todo o equipo se non é de ninguén), e a execución que empeza ou que acaba en 15 días.
Cada fito avisa unha soa vez: «pecha en 7 días» mándase un día, non sete. Pero se amplían o prazo despois dun recordatorio, os recordatorios volven saír para a data nova.
O que non avisa
- O pasado do que empezades a seguir. Seguir un programa non vos trae o seu historial de anos como non lido: só o que pase desde ese día.
- O descartado. Descartar é «non nos interesa», e deixa de avisar.
- O xa concedido ou denegado, agás os recordatorios de xustificación: a partir de aí o voso é xustificar, non o que cambie no boletín.
A campá e a lista
A campá da barra de arriba leva o número dos que quedan sen ler e amosa os últimos ao premela. A lista enteira, co botón de marcalos todos como lidos, está debaixo de Gardados. Cada aviso leva a onde pasou a cousa e ao premelo márcase como lido; o que xa lestes na web non se volve mandar por correo.
O lido éo para toda a entidade, non só para ti. Se a túa compañeira xa o viu e moveu a data, non fai falta que che salte a ti tamén: isto é un espazo de traballo compartido, non unha bandexa de entrada. Por iso debaixo pon quen o viu.