Buscar & Analizar é a pantalla onde está todo o catálogo. Ten tres lapelas, e cada unha responde unha pregunta distinta.
- Convocatorias: o que se pode pedir. É onde se busca cando hai que presentarse a algo.
- Subvencións: os programas con todas as súas edicións, ano a ano. Aquí o pechado tamén conta: é o que di cando adoita saír e dá tempo a prepararse.
- Financiadores: quen dá o diñeiro, con todo o que publica cada un.
Os filtros e a orde
En Convocatorias fíltrase por ámbito, territorio, prazo e orixe, e co perfil da entidade cuberto aparece ademais o de encaixe. O de prazo entra marcado con todo menos as pechadas —abertas, as que abren pronto e as que non teñen data fixa—, porque, se non, a primeira pantalla se enche de convocatorias ás que xa non se pode optar. As pechadas seguen a un clic, para quen busque o histórico.
A orde escóllese aparte: mellor encaixe, pecha antes, maior importe, nome ou engadidas hai pouco. Abre por pecha antes, teñas perfil ou non, porque o prazo é un feito e o encaixe é unha aproximación: poñelo a mandar na orde convertiríao nun ranking que non gañou.
As catro vistas
Os mesmos resultados pódense mirar de catro maneiras: en tarxetas, en táboa, no mapa —por provincia e comunidade, co reconto de cada unha— e no calendario, que as coloca por día de peche e serve para ver se dous prazos se xuntan antes de comprometerse cos dous.
O que filtres escríbese no enderezo: entrar nunha convocatoria e volver non che borra a busca, o botón de atrás funciona, e podes pasarlle a unha compañeira unha ligazón xa filtrada.
Buscar e filtrar todo o catálogo non pide conta. O que si a pide —e é gratis— son os criterios de valoración, os requisitos e a documentación de cada ficha, e todo o que se compara coa túa entidade.