A ficha reúne o que fai falta para decidir se presentarse, e separa sempre o que publica o organismo do que lemos nós.
A cabeceira
Arriba van quen convoca e de que programa é —os dous son ligazóns—, o nome, o importe (dicindo se é o máximo por proxecto ou a dotación total), o prazo, a data de peche, o territorio e os ámbitos. Cando o organismo non publicou data de peche, a ficha pon «pecha (estimado)» e explica que está calculada desde a publicación.
As lapelas
Só se amosa a lapela que ten algo dentro: unha baleira prometería información que non existe.
- Resumo: o obxectivo, as alertas, o orzamento, o cofinanciamento, o período de execución, a resolución prevista e o prazo de xustificación.
- Criterios: con que se puntúa, criterio a criterio e co seu peso.
- Requisitos: quen se pode presentar e que gastos se admiten e cales non.
- Documentación: a obrigatoria, a que suma puntos e como se presenta.
- Histórico: notas de corte por ano e que fan as entidades que gañan, cando hai datos de edicións anteriores.
- A túa análise e O teu proxecto: a análise de encaixe e a puntuación da vosa memoria contra o baremo.
De onde sae cada dato
Os criterios e os requisitos saen de ler o documento oficial con intelixencia artificial. Cada un gárdase coa frase literal das bases da que sae, e despois esa frase búscase dentro do documento orixinal de forma automática, sen volver preguntarlle ao modelo; o que non aparece queda marcado e vai a unha bandexa que se revisa a man.
Os pesos amósanse como os publican as bases. Cando unha convocatoria non dá unha cifra —hainas que din «sen ponderación numérica publicada»—, o criterio amosa esa frase tal cal, sen barra e sen número: pintar unha barra chea para un peso que non se sabe sería afirmar algo que as bases non din.
Non todas as convocatorias teñen as bases lidas: comézase polas que teñen o prazo aberto e encaixan con máis entidades. Cando unha ficha non as ten, dío e leva ao documento oficial en vez de amosar un resumo que non existe.
As bases oficiais e a sede electrónica están ligadas na columna da dereita. O que obriga é ese documento, non a nosa ficha: a análise é unha lectura, non un ditame.