De aquí saen tres correos, e cada un atáscase dunha maneira distinta. Antes de nada, mira o cartafol do correo lixo: é onde acaban case todos.
O de confirmar o enderezo
Vale sete días. Mentres non o abras, o panel non se abre: no seu lugar sae «Confirma o teu correo», cun botón para que cho mandemos outra vez —úsao tamén se o anterior caducou—. Se te equivocaches ao escribir o teu propio enderezo, aí mesmo está saír e entrar con outra conta. E se aínda así non chega, escríbenos desde Contacto e confirmámolo a man.
O do contrasinal
Vale unha hora e serve unha soa vez. Pedir outro deixa morto o anterior, así que abre sempre o último que che chegase. E por seguridade contestamos o mesmo exista ou non a conta: se o correo que escribiches non é exactamente o da conta, non chegará nada e tampouco cho diremos. Está contado en contrasinal e acceso.
O diario de avisos
Sae unha vez ao día, pola mañá, e só se hai algo: nunca chega un correo baleiro dicindo que non hai novidades. Se non chega ningún, o máis probable é que non pasase nada no que seguides. Para que chegue fan falta dous interruptores acesos: o do correo e o da familia de avisos que corresponda, e os dous son de cada persoa, non da entidade.
Os interruptores están en escoller que avisos recibir, e que trae o correo no correo diario.
Os avisos non dependen do correo: están sempre na campá do panel, recíbaos a túa caixa de correo ou non.